Skrifpúltið

Hef eitthvað verið að reyna að mála síðustu daga og það hafa komið smá glætur inn á milli. Var ekki alveg að kaupa þessa mynd af Brekku til að byrja með en er að taka hana meira í sátt. Veit ekki hvað ég geri við hana en hún endar sjálfsagt allavega ekki á sýningunni. Stekkjastaur kom í nótt og ég lifði gleðina í gegnum Dagbjörtu Lóu sem fékk töfrasprota, eyrnalokka og súkkulaði. Þetta var lítilfjörlegt plastdót en gleðin var svo fölskvalaus að maður hefði getað tárast. Brynleifur liggur heima í hlaupabólu og var sofandi þegar ég fór. Ég þurfti svo aðeins að kíkja heim aftur og þá var hann vaknaður og alsæll með eitt súkkulaði og eitthvað lítið plastdót. Þetta er frábær árstími. Það sem veldur mér hinsvegar smá hugarangri er hvað þessir jólasveinar eru miklir umhverfissóðar, dreifandi plasti út um allar koppagrundir. Þeir verða að fara að taka sig á. Kveðja, Bjarni

Hef verið í lægð upp á síðkastið og því hvorki haft kraft til að skrifa né mála. Það er nóg fyrir mig að halda heimilinu gangandi, vinna (sem er líka nauðsynlegt til að halda geðheilsunni) og fara í ræktina. Þó ég sé að fara í gegnum erfiðan tíma núna þá óttast ég það ekki og veit að það vorar brátt. Ég óttast ekki að ég sé að fara að krassa í vinnunni, ég óttast ekki að ég sé að fara að leggjast í bælið. Ég óttast ekki neitt. Ég veit hvert ég stefni og ég veit hvað ég vil. Það hef ég ekki alltaf vitað. En fyrstu skrefin eru þyrnum stráð. Vonandi hendi ég hér inn mynd fljótlega eða skrifa eitthvða sem gæti talist líflegt. En þangað til gætu færslur orðið stopular.

Ég get birt þessa mynd þar sem ég mun ekki setja hana á sýninguna. Ætti kannski að reyna að mála hana aftur því mér finnst vænt um mótífið. Á Hótel Reynihlíð var gott að vinna. Þó Pétur hótelstjóri hafi ekki verið allra, þá mátti hann eiga það að hann treysti okkur unga fólkinu, allavega mér og mínum vinum. Reyndist okkur prýðilega. Ég var svo heppinn að ná að vinna þarna á þeim tíma sem Reynihlíðarfjölskyldan var mest öll eitthvað involveruð í reksturinn. Þetta var sannkallað fjölskyldufyrirtæki. Nú er þetta allt komið í eigu stórrar hótelkeðju með höfuðstöðvar í Reykjavík. Mér skilst að þeir eigi flest húsin á hóteltorfunni. Ætli Víðihlíð og fjárhúsin séu ekki það eina sem situr eftir í eigu heimamanna? En þetta er þróunin sem á sér stað í gömlu góðu sveitinni minni. Nýja auðlindin streymir um svæðið og þeir sem eiga eitthvað undir sér (land) reyna að kasta út nótinni og fanga þessa spriklandi túrista. Þetta er skiljanlegt upp að vissu marki en leiðinlegt hvað sumir virð...

Ég ætlaði að skrifa dramatískan ástarprósa en nenni því ekki...... Hér kemur því jákvæða frétt dagsins. Bjarni

Fórum í sveitina til mömmu og áttum notalega stund um helgina. Dvöldum mest við át og útaflegu en ég fór reyndar í ræktina á laugardaginn. Guðrún þurfti svo að vinna allan sunnudaginn en ég gerði ekki neitt af mér á meðan. Lá bara í sófanum í hálgerðu rússi. Lét mömmu og Helgu Guðrúnu um börnin og starði út um gluggann og dottaði til skiptist. Ég var búinn að ætla að mála einhver reiðinnar býsn um helgina en það fór nú öðruvísi. Þetta urðu 3 myndir í allt, ein af Vogum, ein úr Námaskarðinu og svo ein af kind með 2 lömb- Bláfjall í baksýn. Kindamyndin vakti nú einvherja lukku hjá þeim sem sáu hana en ég held að Vogamyndin og Námaskarðið verði ekkert til sýnis. Ætla helst að setjast niður í kvöld og mála allavega eina í viðbót. Maður verður að halda sér að verki ætli maður að ná upp í þessa sýningu.

Afmæli í gær og ég saddur og sæll. Veður í dag ágætt, logn eins og alltaf. Snjór í fjöllum en autt á láglendi. Blautt malmik, dimmt yfir og maður er farinn að kveikja á lampanum á skirfborðinu þegar maður kemur í vinnuna, slökkva á honum eftir hádegið og kveikja svo aftur um þrjúleitið. Svo koma jólin. Var að fara yfir nýmálaðar myndir í gær og reiknast til að ég sé kominn með 3 myndir sem ég er alveg sáttur við og 5-6 sem eru til vara. Þegar ég verð kominn með 10 sem ég verð ánægður með (og þá kannski 30 í heildina) fæ ég einhvern utan að komandi til að fara yfir þetta með mér. Stefnum á að fara heim í sveit í seinnipartinn. Börnin hlakkar óskaplega til að komast til ömmu og afa. Ég ætla að taka með mér málningadótið og reyna að ná 2-3 góðum myndum um helgina. Fara svo í ræktina og kannski jarðböðin. Þetta verður fínt.

Held áfram að mála og mála og er í raun kominn með 6 myndir sem koma til greina á sýningu. Þessi hér að ofan sú síðasta. Hún var ekki að virka en svo bleytti ég upp vatnið og gerði speglanir sem tókust vel. Það er gott að vera byrjaður að mála aftur.