Skrifpúltið

Stjörnuspá mín fyrir daginn í dag er á þessa leið: „Þú vaknar andfúll, órakaður og í sokkum sem þú fékst á Saga Buisness Class. Leið þín liggur til vinnu og þú fetar stíg sem liggur ofar þeim mörkum sem almenningur hefur skilgreint sem eitthvað norm. Þú munt stela skrifborðshillu á sjöundu hæð, drekka kaffi og sjá álitlega mey sem vinnur í húsinu. Þú sérð ekki hvort hún ber hring á fingri, ef ekki þá er hún lesbísk. Véfréttin færir þér fréttir af húsaþyrpingu á mörkum hins óbyggilega heims. Umskipti gætu verið í nánd, þér mun sennilega vaxa einglyrni og með því munt þú sjá framhjá himinháum reikningum, öðlast nýjan sófa og jafnvel gúmmíplöntu. Þig hlakkar til að fá Gabríel erkiengil í gæs, hann mun þó vera vængstýfður á Reykjavíkurflugvelli eitthvað fram eftir degi. Kvöldflug gæti glatast.“ Ef þið vitið ekki hvað ég er að fara með þessu þá skulið þið kveikja á The lakes of Canada með Sufjan Stevens, halla ykkur aftur í stólnum og slaka á. Þetta skýrist allt á endanum.

Góðan dag. Þá er maður búinn að hlaða inn myndum frá Ameríkuferðinni sem við frændur fórum í. Reyndar tók ég lítið af myndum í NY en því meira af myndum á golfvellinum og golfmótinu sem við kíktum á í Norður Carolínu. Ég læt það kyrrt liggja að fara út í einhverja hard core ferðasögu en áhugasamir geta hringt í mig og fengið nánari upplýsingar. Ferðin var í boði Jens frænda og var útskriftar og 30. afmælisgjöf til mín. Takk fyrir það frændi, þetta var alger snilld! Annars kom fram í fréttum að íslenska ríkisstjórnin hafi ákveðið að styrkja Handknattleikssamband Íslands um 50.000.000 kr. Það er ekki að spyrja að því hvað ríkisstjórnin er alltaf fljót að bregðast við og styrkja góð málefni. Þetta minnir mann á þegar þeir, eftir mikla fundi gáfu 3.000.000 kr. þegar flóðbylgjan skall á löndin umhverfis Indlanshaf. Kveðja, Bjarni

Nú er ég búinn að fara algerlega yfir strikið, hingað og ekki lengra. Ég játa það að nú hef ég klæðst köflóttum stuttbuxum, pólóbol, borið hvítan hanska og leikið golf innan um glæsivillur og litskrúðug blómabeð. Nýkominn frá Ameríku og luma á einhverjum myndum. Veit að fólk getur ekki beðið eftir að sjá myndir af mér í þessum útbúnaði. Er að dunda við að hlaða inn myndum og set kannski einhvern pistil. Saga sveitadrengs í NY og NC. New York, eins og Siglufjörður með of mörgu fólki. Nánari lýsingar síðar. Eins og sést á myndinni þá var ég í heimsókn hjá Hrafndísi í gær. Við tókum þessa mynd til að sýna fólki hvað við erum með flott hár. Pabbi hennar var að reyna að vaska upp á meðan og hefur örugglega klúðrað því. Meira síðar

Af íslenskum íþróttamönnum eru sundmenn vafalaust þeir allra slökustu. Á þessari eldfjallaeyju sem vér lifum á, er ofgnótt af heitu vatni og busllaugum út um allar trissur þar sem rakaðir strípalingar geta synt þar til þeim liggur við drukknun. Þegar íslenskur sundmaður svo fer á stórmót, setur Íslandsmet með frábæru sundi, þá er það yfirleitt ekki nóg til að koma honum í topp 200. Því má þó ekki gleyma að nú eru liðnar einhverjar milljónir ára síðan við skriðum upp úr drullupollunum og það er því nokkuð öfug þróun að vera að reyna að keppa í því hver er fljótastur að ferðast milli staða við þessar óvistvænu aðstæður sem vatn er. Frá landnámi hafa þegnar þessa lands forðast það sem heitan eldinn að detta í vatn því það hefur yfirleitt endað með drukknun. Ekki er betra að detta í hver. Við sem þjóð ættum því ekki að taka það nærri okkur þó við séum léleg í þessari heimskulegustu íþróttagrein mannkynssögunnar. Það væri nær lagi að taka nærri sér dapran árangur íslenskra frjálsíþróttamann...

Jæja nú er haustið komið og þá er hægt að fara að blogga aftur. Haustið læddist aftan að mér og stakk mig í bakið og sparkaði mig niður. Finnst alltaf sumarið búið þegar verslunarmannahelgin er á enda. Fór með Dóra í hreindýr um helgina og var það ferð til fjár fyrir skyttuna (ég var áhorfandi). Dóri skaut alveg hreint voðalegan tarf sem sló alla mína tarfa út á einu bretti og hraðar en Árni Jónsen slær niður homma á þjóðhátíð. Kallinn afgreiddi þennan feikilega tudda eins og atvinnumaður, 95 kg. fallþungi og krúna sem er á stærð við sendinn á útvarpshúsinu í Efstaleiti. Annar bara skító sæmó að frétta. Er að fara til USA í næstu viku að horfa á PGA mót í golfi. Ferðin verður í boði Jens og við erum með full clubhouse pass og allar græjur. Finnst líklegt að ég eigi eftir að segja nokkuð ítarlega frá því. Jæja vinna meira....... Kveðja úr kuldanum, Bjarni

Eruð þið að upplifa óbærilega leiðinlegt sumarfrí? Vantar ykkur eitthvað að gera í góða veðrinu? Tugþúsundir Íslendinga þjást um þessar mundir og eru að drepast úr leiðindum og því ákvað ég að koma með 3 góð ráð til að eyða tímanum: 1) Skrifið bréf til allra ráðherra í Ríkisstjórninni. Í bréfinu skuluð þið lýsa hvaða persónulegu væntingar þið gerðuð til þeirra er þau hófu setu í Ríkisstjórninni. Endið hvert bréf á því að segja þeim hvað ykkur finnst um þau sem persónur. 2) Ef þið vitið um örnefni í náttúru Íslands sem hefur að öllum líkindum í fyrndinni borið annað nafn, athugið hvort þið getið ekki fundið lögfræðing og farið í mál við landeigendur. Dæmi, Hvannfell (við Búrfellshraun) heitir Hvammfell á sumum gömlum landakortum. 3)Skrifið lista yfir allt sem fer í taugarnar á ykkur í fari íslenskra ökumanna og í umferðamenningu þjóðarinnar. Opnið bloggsíðu um umferðaröryggi og afhendið Dómsmálaráðherra plagg með 1500 undirskriftum og gefið honum gulllitað stýri. Ef engin af þessum till...

Þeir sem þekkja mig vita að mér finnst fátt skemmtilegra en að veiða. Ferðir mínar til Svíþjóðar eru gjarnan hápunkturinn á veiðiveislunni ár hvert og nú á ég pantað flug til Svíþjóðar þann 14. ágúst. Stefnan er tekin á Smálönd, þar sem grænir skógar bíða, vonandi fullir af fallegum dýrum sem bíða eftir því að komast í snertingu við sósu og kartöflur. Í félagskap snusandi veiðikarla höfum við feðgar átt margar góðar stundir. Yfirleitt er étinn matur að skapi sannra karlmanna, baunasúpur og flesk t.d, menn leggja sig þegar þeir eru þreyttir og skíta þegar þeim er mál. Lífið snýst um veiðar og maður gleymir öllu öðru í nokkra daga. Dásamlegt. Eitt af ævintýrunum sem við höfum lent í þarna tengist veiðihundum. Veiðifélagar pabba eiga 3 loðna óþokka, pínulitla en duglega terrier hunda sem eru notaðir við að spora og reka dýr. Hinsvegar, þegar við sitjum á passi, bíðum upp í turni í frið og ró þurfa þessir ferfætlingar að sitja heimavið. Til að gera langa sögu stutta þá finna þeir sér stund...