Álagspróf fyrir keppni

40 mínutur á stöðugu álagi (steady state).

Nú er ekki nema rétt vika í fyrstu keppni og ég farinn að fá í magann út af þessu. Stundum velti ég því fyrir mér hvað ég er eiginlega að gera sjálfum mér með að vera að keppa í þessum blessuðu hjólreiðum. Ég hef litla trú á sjálfum mér, maður er alltaf með smá hræðslu við að lenda í slysi í hópnum, mér finnst ég ekki tilheyra í þessum hópi, finn fyrir hræðslu að missa hópinn (game over) og svo er náttúrulega leit af einhverju sem er jafn krefjandi líkamlega. Og eftir að hafa verið hjá þjálfara í allan vetur upplifi ég miklu meiri pressu á að standa mig.

Til að róa mig rifja ég upp síðasta bikarmót ársins í fyrra þar sem mér fannst ég loksins vera öruggari í hópnum og þorði að láta að mér kveða. Þó úrslitin hafi ekki verið frábær, þá kom ég brosandi út úr því móti.

Annars er staðan á mér núna sennilega betri en hún hefur nokkurntíma verið. Ég er reyndar 2-3 kg. þyngri en ég vildi vera en ég hef aldrei verið með meira power í löppunum.

Í gær tók ég æfingu sem heitir 40 mínútna Steady State- sem þýðir að halda 40 mínútum á ca. 95% af mesta afli sem maður getur haldið í klukkutíma (FTP). Það er skemmst frá því að segja að ég slátraði þessari æfingu og hélt 260 vöttum í þessar 40 mínútur án þess að vera neitt að ganga fram af mér. Púlsinn reis úr 145 í byrjun og var nokkuð stöðugur í 153 í lokin. Til samanburðar hefði púlsinn hjá mér sennilega verið um 170 í lokin á 20 mínútna FTP testi.

En allavega, það var mjög gott að prófa að taka svona langt effort stuttu fyrir keppni því nú átta ég mig betur á hvað ég get gert. Ef svo ólíklega vill til að ég lendi í að reyna að stinga af einhvern hóp með einhverjum veit ég að ég á að geta haldið þessu afli nokkuð lengi. En ég hlakka til að heyra hvað Ingvar hefur um þetta að segja.