Æfingadagbók

Síðasta föstudag fórum við vinnufélagarnir út að borða. Fyrir valinu var jólamatseðill Rub23 sem var ekkert slor frekar en venjulega. Upp úr stóð nautasteikin sem var sjúklega mjúk og bragðgóð. Fullt af járni, steinefnum og próteini þar á ferð.

Æfingavikan hefur verið frekar róleg en gengur bara vel. Ég tók VO2max æfingu í fyrradag (sem ég fann örlítið fyrir daginn eftir) en svo var rólegur klukkari hjá mér í gær. Eftir það skelltum við Harpa okkur í ræktina og tókum vel á því. Ég er með vott af strengjum í efri partinum og maganum.

Eftir vinnu í dag tek ég VO2max æfingu númer tvö af þrjú í þessari viku (5x3mín) og svo kemur aftur rólegur klukkari á morgun. Á laugardaginn (Þorláksmessu) er komið að síðustu erfiðu æfingu vikunnar sem er 30/15 VO2 max (2x10 mín). Það þýðir að maður er í hálfa mínútu á VO2 max og fær svo hvíld í 15 sekúndur. Þannig gengur það í 10 mínútur, svo kemur smá hvíld og svo byrjar maður aftur. Þetta er því nokkurskonar tabata æfing þar sem stutt hvíld leyfir manni ekki að jafna sig að fullu. Drullu erfitt. Vikan mun því enda á laugardegi, samtals 8 klst. með ræktinni.

Annars er bara mest allt að smella fyrir jólin og flestir ef ekki allir pakkar komnir í hús. En eins og venjulega er þetta alltaf stress. Börnin eru komin í frí og hafa þurft að vera sjálfala þar sem ég er að vinna alla daga. En þau eru dugleg að redda sér og finna sér eitthvað að gera.