Klikkaðar hugmyndir og smá útihjól

Laugardagstúr rétt hjá Gásum.

Ég og Harpa skelltum okkur í gærmorgun í smá hjólatúr til að nýta góða veðrið. Það var reyndar ekkert voðalega hlýtt en það var kyrrt, það er fyrir öllu. Við hjóluðum að Hlíðarbæ og þaðan út á malbiksendann rétt hjá Gásum. Við héldum fínu endurance pace og ég var drullu sprækur. Ég hef verið að hjóla minna síðustu vikuna, er úthvíldur og held svei mér þá að ég hafi aldrei verið öflugri. Það er eiginlega synd að það sé ekkert mót eftir til að spreyta sig og sjá hvar maður stendur.

En núna af klikkuðum hugmyndum. Í fyrravetur hafði ég samband við HÍ til að biðja þá um að senda mér yfirlit yfir námsframvinduna mína frá því ég var í meistaranámi í íþrótta og heilsufræði. Ég gerði þetta á einhverju erfiðu tímabili í vinnunni og var að detta í gömlu hugsunargildruna um að flýja erfiðleikana með að skipta bara yfir í eitthvað annað. Grasið er alltaf grænna hinumegin.

Núna er ég aðeins farinn að hugsa um þetta aftur (á tíma hjá námsráðgjafa á föstudaginn) en það er þó alls ekki svo að ég sé eitthvað að spá í að flýja af hólmi í vinnunni minni. Hún er drullu krefjandi á köflum en ég hef verið að koma sjálfum mér á óvart og finnst gott að ögra mér og gaman þegar ég næ að lenda erfiðum málum. Ég ætla að berjast þar áfram og er hvergi nærri búinn að klára mín markmið á þeim bænum.

En ástæðan fyrir því að ég fór að spá í þessu aftur er að ég er að ég væri alveg til í að prufa að taka að mér  þjálfun á einhverjum tímapunkti. Síðan 2010 er ég búinn að vera viðloðandi hlaup, hjól og líkamsrækt og hef haft brennandi áhuga á næringu. Ég held að ég hafi ýmsu að miðla og hef mjög ákveðnar skoðanir á því hvernig þjálfari á að vinna og nálgast viðfangsefnið. 

Þó ég telji mig hafa alveg nóg til brunns að bera að koma einhverjum sófakartöflum í gott form (ég myndi aldrei vilja taka að mér lengra komna strax), þá kynni ég eiginlega ekki við að gera það nema að ég hefði náð mér í einhver réttindi eða menntun. Ef ég hinsvegar dusta rykið af þessu meistaranámi og vel mér áfanga og lokaverkefni með það fyrir augum að ég ætli að þjálfa, þá horfir þetta öðruvísi við. Þá gæti ég tæknilega séð tekið að mér 2-3 einstaklinga strax um áramót með vinnunni.

En ég var líka að tala um klikkaðar hugmyndir. Ég er í vinnu sem er sjúklega krefjandi og er með börnin aðrahverja viku. Þegar ég er með börnin þarf ég að koma Dagbjörtu í fimleika og píano þrisvar í viku og ég á ekki bíl. Málningarvinna og sköpun hafa því miður setið á hakanum en mig langar heldur ekki til að henda því alveg frá mér. Til að kóróna þetta þá æfi ég líka yfirleitt 6-12 klst í viku og ég var við það að brenna yfir á álagi í vor þegar ég braut mig. Þetta kannski meikar ekki mikinn sens.

En byrjunin er að heyra í námsráðgjafanum, skoða hvort ég geti fengið eitthvað metið og hvort hægt sé að stilla upp einhverju plani sem er ekki allt of þungt. Ef ég geri þetta skynsamlega þá gæti þetta alveg opnað nýjar dyr fyrir mér þegar frá líða stundir.