Vikulokin

 

Þær eru oft skemmtilegar myndirnar sem maður tekur óvart. Þarna er hann Davíð að berja saman einhverja magnaða og djúpa setningu í kollinum.

Það er með ólíkindum hvernig tíminn æðir áfram. Fróðir menn segja mér að það sé föstudagur á morgun. Veðurspáin er ekki góð og ég var kominn með hálgerðan kvíða yfir því hvað ég ætti af mér að gera. En til að koma í veg fyrir tilvistarangist, þá er ég búinn að berja saman eitthvað smá plan.

Eftir vinnu á morgun ætla ég að fara heim, laga til og þrífa. Ég ætla meira að segja að þrífa ofninn, enda búinn að kaupa forláta eitur til að úða inn í hann. Eftir það ætla ég bara að slappa af og horfa á eitthvað gott. Síðan er ég búinn að taka ákvörðun um að mála myndir fyrir Dyngjuna á laugardag og sunnudag. Nú styttist í ferðasumarið og ég verð að fylla á lagerinn minn. Helgin fer í þetta en svo ætla ég kannski að hjóla eitthvað smá ef það verður ekki undir núll gráðunum.

Núna ligg ég í sófanum og bíð eftir að það byrji húsfundur á Zoom. Langar rosalega til að bera upp einhver skrítin erindi um lykt, kusk í sameign eða reykingahóstann í gamla manninum í næsta stigagangi. En nú eru Pavel og Eyþór Arnalds að fara að rífast um hámarskhraða í Reykjavík og ég má ekki missa af því. Eyþór er æði, ég er viss um að hann er einhver gjörningur. Kannski er hann Banksy?