Gary Tucker

Mynd eftir Gary Tucker

Það er föstudagur og ég sit yfir flensugemlingunum mínum heima hjá Guðrúnu svo hún komist nú aðeins í vinnuna. Þar sem ég ætla að mála eitthvað um helgina er ég búinn að vera aðeins að stúdera myndbönd á Youtube. Reyna aðeins að fá innblástur.

Ég datt inn á einhvern Gary Tucker og varð alveg húkkt. Hann er með mikið af góðum myndböndum. Hann notar svipaða tækni og Alvaro Castagnet, þ.e. hann byrjar á því að þekja pappírinn með þynnri litum (wash) og vinnur sig smám saman upp í sterkari liti og highlights. Passar sig að skilja eftir það sem á að vera ljóst, það er það erfiðasta. Þetta er aðferð sem ég hef stundum reynt en alltaf gefist upp áður en ég næ einhverjum tökum á þessu.

Nú hefur mig aðeins langað til að mála bæjarmyndir frá Akureyri með fólki inná og því datt mér í hug hvort ég gæti nýtt þessi myndbönd í að yfirfæra tæknina. Ég hef t.d. reynt að gera bæjarmyndir úr Göngugötunni en alltaf endað með því að fokka því upp. Orðið alltof nákvæmur og skilið eftir hvít ljót göp á milli formanna. Það gerist ekki ef maður er öruggur á að þekja allt í einni atrennu.

Gary Tucker - Paris street scene

Hér fyrir ofan er klippa úr einu myndbandi sem er á Youtbue. Í þessu tilfelli er engin nákvæmni sem þarf til heldur snýst þetta fyrst og fremst um að kunna á flæðið á litunum, rakastigið á pappírnum, litstyrkinn og hvernig þú breytir úr köldum í heita liti.. Mér hefur alltaf fundist gaman að gera svona bæjarmyndir og mér þætti geðveikt að geta gert eitthvað í líkingu við þetta. Svo er það ekki verra að þær myndu ábyggilega seljast ágætlega.