Afmæli frumburðarins

Brynleifur listamaður að störfum

Frumburðurinn minn hann Brynleifur Rafnar á afmæli á morgun, 11. október. Nú er hann að fylla 8 árin. Brynleifur er einstaklega ljúfur drengur, eldklár, hæfileikaríkur og fullur af lífsorku. Það er ekki hægt að lýsa því hversu gaman er að vera í kringum þennan gullmola, hann gerir alla daga betri. Stundum þegar maður horfir á hann og vini hans leika sér veltir maður fyrir sér afhverju fullorðið fólk missir hæfileikann að skemmta sér svona vel, yfir litlu. Stundum er bara hreinlega eins og lífsgleðin sé svo mikil að þeir missi jarðsamband og manni finnst eins og þeir muni á hverri stundu yfirvinna þyngdaraflið og svífa á braut.

Ég er búinn að vera að undirbúa pakka og gjafir. Síðan verða amerískar pönnukökur á sínum stað kl. 07.00 í fyrramálið, beikon og appelsínudjús. Guðrún ælar að koma og við ætlum að vekja drenginn í sameiningu með pökkum og knúsi eins og við höfum alltaf gert. Ég gef honum pening (hann er að safna sér fyrir Playstation 4) og Dagbjört Lóa ætlar að gefa honum Nerf byssu. Það ótrúlega er að hún er ekki einu sinni búinn að kjafta í hann hvað hann á að fá.

Seinnipartinn á morgun leggjum við (ég og börnin) af stað í Hofsós þar sem við ætlum að eyða helginni með mömmu, Agli, Halldóru og Helgu. Það er mikil spenna þó Brynleifi finnist reyndar ekki gott að ekkert sjónvarp sé í húsinu sem við verðum í. Það er nefnilega landsleikur á morgun; Ísland vs. Frakkland.