✝ Tiger Woods, ágúst 2009 - apríl 2012

Tiger Woods

Kisa litla dó í dag, sumardaginn fyrsta. Hún gerði manni stundum lífið leitt en auðvitað þótti manni alltaf vænt um þetta grey. Daginn sem hún kom fyrst skreið greyið undir skáp, logandi hrædd og sást ekki mikið fyrstu tvo dagana. Síðan fór hún smám saman að færa sig upp á skaptið og vildi á endanum helst alltaf vera að þvælast eitthvað með okkur. Eftir að Brynleifur fæddist varð hún reyndar hálfgerð afgangsstærð á heimilinu en þá hafði hún samt komið sér upp ákveðnum rútínum sem voru eins dag frá degi.

Hún kom alltaf inn á morgnana og  sat í glugganum þegar maður borðaði morgunmat. Hún fylgdi strákunum í skólabílinn, kom svo inn aftur og svaf svo í stólnum sínum, oft fram undir kaffi. Steig þá niður, teygði úr sér, geispaði og labbaði syfjulega fram í dallinn sinn.

Fyrir tveimur vikum varð hún veik greyið. Hún byrjaði að æla og æla, hári og grasi. Hríðhoraðist svo að lokum en aldrei fannst neitt að henni. Hún dó svo hjá dýralækninum í morgun.

Langar að lokum að setja inn eina mynd sem lýsir henni ágætlega. Guðrún vaknaði í sófanum og svona sat kisa til fóta, eins og ekkert væri sjálfsagðara.

Jæja, nóg af væmni. Þakka kisu fyrir samveruna og hún getur verið róleg með það að það kemur engin kisa til með að taka hennar stól eða dalla.

Kveðja, Bjarni