Jaktresan

Jæja þá er maður kominn úr þessar undursamlegu veiðiferð og bölvaður hversdagsleikinn að taka við. Það er nú samt kannski honum að þakka hvað þetta er hrikalega gaman. Nú er bara að ná sér niður á jörðina og koma ferskur inná og setjann.

Í stuttu máli gekk þetta ótrúlega vel fyrir sig allt saman. Fyrsta morguninn sátum við á sitthvorum staðnum, ég og pabbi og hann náði fínum bock. Fyrir röð tilviljanna sem ég nenni ekki að rekja hér (of langt mál) náðum við að sölsa undir okkur öðrum akri fyrir næsta morgun og þar skaut ég bock sem var alveg þrusu fallegur. Síðan höfum við séð fullt af dýrum og haft það bara kósí. Étið pulsur, beikon, egg, sænskar kjötbollur og danska fangelsikássu, sofið lítið, lagt okkur oft, drukkið kaffi, verið stungnir af moskíta-flugum, hugsað um veiðar og talað um þær. Svo að sjálfsögðu veitt. Ef ég fer með rétt mál þá féllu 5 bockar, 3 refir og einn greifingi í þessari ferð. Það voru að sjálfsögðu fleiri kallar sem komu að þessu . Ég á nú eftir að skrifa upp betri lýsingu á ferðinni en set hana nú ekki inn á bloggið þar sem það er ábyggilega ekki pláss á internetinu fyrir söguna. Var svo að átta mig á því að gæsaveiðitímabilið er að byrja heima og vona að það skjóti enginn neitt á meðan ég er í burtu.

Jæja nú er ég bara farinn að rugla eitthvað enda búinn að sitja í umferðarhnút á 10 km/hraða á hraðbrautinni upp til Osló og láta svo rukka mig fyrir það í þokkabót. Setti inn myndir úr ferðinni í albúm en þær heppnuðust því miður óvenju illa. Þ.e myndirnar af okkur með dýrin eru ekki góðar en einhverjar myndir eru þarna sem sjálfsagt er gaman að skoða, sérstaklega fyrir refi. Svo til að toppa þetta þá hélt ég að ég hefði gleymt vélinni heima þegar ég skaut dýrið mitt en var víst með hana á mér. Hann er því nokkuð tuskulegur greyið á myndunum, enda búið að taka innan úr honum.