Stöðuleiki þrátt fyrir miklar annir

Ég er með frekar gamaldags hjólatösku og það er býsna mikið verk að pakka þessu til að lágmarka hættuna á skemmdum í flutningi. Börin á sófanum að horfa á Eurovision.

Það er óhætt að segja að spennan sé að aukast hjá okkur Hörpu. Við keyrum suður í fyrramálið, gistum eina nótt í Keflavík og fljúgum svo út á þriðjudagsmorgun kl. 09:00. Ef allt gengur að óskum lendum við á Kanarí rúmlega 14:00 á staðartíma og vonumst til þess að ná það snemma á hótelið að við náum að setja saman hjólin og taka smá hring. Það er mjög mikilvægt til að tékka á hvort allt sé í lagi og svo er það líka betra fyrir líkamann að fá smá hreyfingu fyrir fyrsta stóra daginn. Ná úr sér hrollinum.

Síðuastu fjórar vikur á Strava.

Þessi vika er búin að vera hálfgerð geðveiki hjá mér og á tímabili var ég ekki viss um hvort ég næði að taka allar æfingar skv. plani. En ég setti undir mig hausinn og náði fullri viku. Það var helst um helgina þar sem ég var með tvær 3 tíma æfingar þar sem þetta var orðið frekar sveitt. Það voru ekki margar mínútur um helgina sem ég settist niður og ég var t.d. að pakka hjólinu á meðan við börnin horfðum á Eurovision.

Ástandið á líkamanum er þokkalegt en ég er samt kominn með aðeins í bakið. Það er eitthvað sem ég hef verið blessunarlega laus við hingað til. Ég tengi þetta við aukið æfingaálag og veit upp á mig skömmina með að hafa ekki verið að gera armbeygjur, planka, teygjur og annað slíkt sem er lykillinn að því að halda sér í lagi. Ég verð að taka mig á með þetta og reyni að vera duglegur að taka æfingar á sundlaugarbakkanum.

Jæja ég ætla að taka smá snúning á dótinu sem ég er að henda í tösku og athuga hvort ég nái að horfa á einn þátt áður en ég fer í bælið. Ég er logandi hræddur við að gleyma einhverju, sérstaklega þar sem maður er búinn að rífa allt hjólið í spað. Það væri skelfilegt að gleyma öxli, afturskiptinum, dekki eða einhverju svoleiðis. 

Annars er ég að horfa á Mayor of Kingstown og mæli eindregið með þessum þáttum, þó þeir sú mjög ljótir. Og talandi um Mayor of eitthvað.... þá detta mér í hug aðrir þættir, Mayor of Easttown með Kate Winslet.  Algert skylduáhorf. Báðar serúrnar eru í boði á Premier.