Verkefni

Vinnuborðið komið í notkun aftur.

Ég tók að mér að mála mynd fyrir sérstakt tilefni í lok síðustu viku. Ég var frekar rólegur yfir þessu því ég hélt að ég hefði 2 mánuði til að klára þetta og koma þessu í ramma. Í gær hringdi svo sá sem pantaði verkið og spurði hvernig gengi? Ég sagði honum að ég væri alveg slakur og ekkert farinn að tékka á þessu. Þá kemur í ljós að ég hafði 2 daga en ekki 2 mánuði. Þetta var ekkert rosalega notaleg tilfinning.

En ég settist s.s. niður í gærkvöldi og byrjaði eitthvað að sulla og gekk reyndar ekkert allt of vel. Ég segi ekki að ég hafi verið farinn að panikka, en mér allavega líst ekkert sérstaklega á blikuna. En ég get huggað mig við að ég hefði aldrei tekið þetta að mér hefði ég vitað að fyrirvarinn væri svona stuttur. En ég hef kvöldið í kvöld og næ kannski að teygja þetta fram á föstudagskvöldið.

Annars er ég búinn að kaupa fyrsta skammtinn af því sem mig vantar fyrir hjólaferðina. Það borgar sig að panta ekki fyrir meira en 40 þúsund í einu svo maður þurfi ekki að borga fyrir tollskýrslu. En ég pantaði tösku í stellið (frame bag), bremsupúða, brúsafestingar á gaffalinn og undir stellið og 2 x 1,5 L flöskur. Síðan reyndar fann ég fína SPD pedala á racerinn í Útisport. Ég kippti þeim upp á leiðinni í Hagkaup þar sem ég keypti Macrame spotta til að flétta blómahengi. Hljómar eins og lygasaga en er satt. Birti hér myndir þegar hengið verður tilbúið.