Matarkarfan hækkað um 6,3% frá áramótum

 Ég rakst á þessa fyrirsögn í gær en eins og venjulega hef ég ekki tekið eftir neinu þegar ég versla. Ég bara fer í búð og kaupi það sem mig vantar. En ég hef samt aðeins verið að reyna að spara meira upp á síðkastið og versla skynsamlega. Ég reyni að elda stóra skammta og hafa með mér í vinnuna. Þetta reyndar gengur betur þegar börnin eru ekki hjá mér því þau geta ekki étið allt sem ég vil borða. Þá er gott að grípa í súrmjólk, eggjahræru með osti og súrmjólkin klikkar ekki.

En það eru nokkur ráð sem maður getur farið eftir til að spara stórar fjárhæðir:

1. Kaupa ekki sódavatn eða gosdrykki. Á tímabili átti ég alltaf sódavatn í dósum sem mér finnst alveg geggjað gott að grípa í en þetta telur fljótt.
2. Elda mat þar sem maður þarf ekki sérstök krydd, sósukrukkur og annað sem skemmist svo í ískápnum. Ég bý t.d. til mitt taco krydd, það er mjög einfalt.
3. Ég kaupi bara gúrkur og paprikur sem salat. Börnin borða þetta alltaf og salat er dýrt og skemmist hjá mér.
4. Borða bara 3 máltíðir á dag og sleppa millimálum.
5. Reyna að elda hafragraut frekar en að borða alltaf morgunkorn.
6. Kaupa frekar súrmjólk en jógúrt eða AB-mjólk í dósum.

Annað sem ég er farinn að gera er að ef það er pizzakvöld, þá kaupi ég Dr. Ötke pissur og bæti á þær áleggi. Elda þær á háum hita eða pizzasteini á útigrilli og finnst þær betra en 3000 króna pizzur á pizzastöðum. Spara 2400 kr. per pizzu. Þó það tengist ekki beint matarkörfunni þá er ég að reyna að sleppa því alveg að éta í mötuneytinu í vinnunni eða éta Zerrano eða kebab.

Að lokum, þá reyni ég oft að sleppa því að fara í búðina og reyni þá bara að éta það sem er til í ískápnum. Ef ég á egg þá er ég góður. Rista eina brauðsneið, spæli 3 egg og ét svo bara eitthvað drasl með þessu sem er til.

Ég tók einu sinni saman hvað ég var búinn að eyða í mat á einum mánuði og það fór upp í 120.000 krónur sem er alveg óþarflega mikið. Það virðist nú ekki vera bjart framundan í efnahagslífinu þannig það er sennilega best að vera svolítið harður við sig.

Annars gengur bara allt þokkalega. Barnlaus vika; ræktin, matur og æfingar. Stefni á gæsaveiðar um helgina með Þórði. Vorum að gera að gæsum áðan og gerðum 5 kg. af pylsum. Sei sei