Fiskibollur

Við Guðrún tókum okkur til í gær og steiktum óvart ca. 100 fiskibollur. Ástæðan fyrir því að ég segi óvart er vegna þess að þegar ég tók úr frysti á sunnudaginn lagði ég poka með 3,3 kg. af nýjum þorskflökum, veiddum af sjálfum mér að sjálfsögðu, á gólfið og þau þiðnuðu. Því þurftum við að redda þessu og lausnin var fiskibollur. Uppskriftina tókum við úr gamalli kennslubók í því hvernig eigi að vera alvöru kona. Hér á eftir fylgir einföld uppskrift.

400-500 gr ýsa, þorskur eða ufsi (helst ferskt)
2 tsk salt
2,5 mtsk hveiti
1,5 mtsk kartöflumjöl
2,5-3 dsl mjólk
1-2 laukar (2 er of mikið fyrir minn smekk)
1/8 tsk hvítur pipar
1 egg (má sleppa)
125 - 150 gr smjörlíki ef á að steikja. Mér finnst það reyndar líka vel í lagt.

Nú jæja allavega. Þurrefni hrært vel saman og eggjum og mjólk blandað rólega saman þar til verður að soppu. Hrært samanvið fiskinn og laukinn. Við söxuðum laukinn bara og bættum í en kannski má hakka hann með fiskinum? Veit ekki hvort er betra. Best að láta þetta jafna sig í smá stund og stífna áður en maður fer að steikja eins og andskotinn sé á hælunum á manni. Eftir mismunandi útfærslur og bollaleggingar á tæknilegum nótum fundum við út að best væri að taka smá slettu af fiskfarsi í lófann, móta bollur og klappa þær með hveiti. Síðan bara að steikja frá sér allt vit og setja í frystipoka.

Úr þessum 3,3 kg af þorskflökum (sem Guðrún snyrti af fagmennsku) fengum við um 7 máltíðir fyrir okkur familíuna, ca. 10-16 bollur í poka (fór eftir bollustærð). Síðan étur maður þetta með brúnni sósu, Býldudalsgrænum baunum og rababarasultu og glasi af mjólk. Snilld.

Kveðja, Bjarni