Jæja jæja

Langaði bara aðeins að gera ýtarlegri grein fyrir málum mínum og létta aðeins betur af mér. Nú er svo komið, eins og ég gat hér um að neðan, að ég hef "skilmerkilega" gengið frá mínu verkefni og komið því í hús. Dagurinn í gær leið hjá í einhverri þoku, blendnar tilfinningar og bömmer yfir að ég hefði átt að gera hitt og þetta öðruvísi en ég gerði. Svona er þetta bara, maður verður bara að reyna að fara að njóta þess að vera búinn með þetta.

Skiladagur gekk þannig fyrir sig að ég skilaði af mér, fór að lyfta, fékk mér pulsu, fór og tók 9 holur í golfi, keypti mér snakk og súkkulaði og sofnaði að lokum jórtrandi í sófanum. Það vantaði bara að Scarlet Johannson hefði bankað grátandi uppá og sagst vera búin að átta sig á því að hún elskaði mig, ég væri týnda pússlið í hennar lífi. Er hægt að biðja um betri dag?

Núna er maður bara að ganga frá í pappírum og undirbúa vörn. Ég hef aldrei verið talinn neitt sérstaklega góður varnarmaður en þetta hlýtur að reddast. Svo er allt útlit fyrir að maður setjist aftur að skriftum og reyni að koma þessu fróðleik sínum í greinar til birtingar. Það er því ekki loku fyrir það skotið að ég sé orðinn miðaldra sérfræðingur í rannsóknum tengdum fiskeldi, búsettur úti á landi, keyrandi um á Skoda með golfsett í skottinu.

Kveðja, Bjarni