Grillaðar lappir

Þá var sól.

TSS (Training Stress Score) er mælikvarði á erfiðleika æfinga. Ef þú tekur æfingu upp á 100 TSS myndi það samsvara því að þú værir á FTP (mesta afli sem þú getur haldið í klukkustund) í eina klukkustund. Þannig að ef ég er með FTP upp á 250 núna, þá væri það eins og ég væri á 250 vöttum í eina klst. Helsti gallinn við TSS er hinsvegar hversu lélega mynd það gefur af álaginu sem felst í að hjóla mjög lengi rólega. Hvað um það.

TSS er samt ágætt til að átta sig á erfiðleika æfinga og einnig til að horfa á hverja viku fyrir sig. Í fyrravetur þegar ég átti erfiðar vikur á hjólinu inni þá var ég að taka ca. +600 TSS en þegar ég tók stórar vikur úti í sumar þá var ég að fara í 900+. Ég er bara telja þetta upp til viðmiðunar því áður en ég byrjaði aftur í prógrammi hjá Ingvari var ég að dúlla mér í 200-300 TSS og Ingvar er kominn með mig upp í ca. 500 núna með tveimur lyftingaæfingum. Ég er því ennþá frekar rólegur.

Vikan sem er í gangi.

Ég er að þola þetta ágætlega ennþá en lyftingaæfingarnar eru alveg að flækja þetta, bæði tímalega og svo taka þær djöfulli mikið úr manni ef maður tekur hressilega á því. Á þriðjudaginn fór ég í ræktina fyrir vinnu og tók threshold æfingu eftir vinnu og það gekk vel. En í gær henti ég mér í ræktina eftir vinnu og tók m.a. þunga réttstöðu og fór svo beint heim að taka steady state æfingu. Það var of mikið og ég náði ekki að klára síðasta settið. Ég var kominn með krampa og gjörsamlega búinn á því. En það er s.s. ekkert til að hafa áhyggjur af- það er líka góð æfing að hjóla þegar maður er búinn að þreyta sig. Ég hlakka samt alveg til að losna við flækjustigið að vera með 2 æfingar á dag.

Í dag er ég bara með 1 klst recovery og svo þarf ég að fara með Dagbjörtu á foreldraæfingu í fimleikunum að hoppa á trampolíni og láta öllum illum látum. Eins gott að maður slasi sig ekki.