Hvíldarvika

Þar sem ég er að fjalla um hvíld set ég bara þessa mynd með færslunni. Maður er hvort sem er ennþá með hausinn úti á Tenerife.

Í gær lauk ég þungri æfingaviku þar sem ég tók 6 hjólaæfingar og 2 lyftingaæfingar. Ég er í fínu líkamlegu standi eftir þetta og ég bæti kannski aðeins í klukkustundirnar á síðustu metrunum fyrir keppnistímabilið. Núna eru lyftingaæfingarnar líka að detta út og það einfaldar manni mjög skipulagið. Ég mun halda áfram að reyna að setja þetta upp í 3 daga blokkum með hvíldardegi á milli.

Núna er komin hvíldarvika og það passar fínt því ég þarf að fara suður með börnin um helgina og svo er síðasta Vetrarhlaup UFA á miðvikudaginn. Ég telst því góður ef ég kem inn 2 hjólaæfingum. Ætli maður taki svo ekki með sér hlaupaskóna suður svo maður nái smá hreyfingu í bænum og fylli út tímana sína.

Annars er alltaf smá tómleiki sem fylgir svona hvíldarvikum. Mér finnst gaman að æfa og kannski er maður líka bara sólginn í endorfínkikkið sem maður fær. Æfingarnar eru líka hugleiðsla fyrir mig og tímabundin útstimplun úr raunveruleikanum. 1-3 klst þar sem maður gleymir öllu daglegu amstri og kemur endurnærður til baka. Þegar maður fær svo allt í einu 2 daga í röð þar sem maður æfir ekkert þá finnst manni það hálf tómlegt.

Eins verður maður að passa sig á að gefa líkamanum frí jafnvel þó manni líði eins og maður geti haldið endalaust áfram. Það er mjög algengt að fólk vilji fara í ræktina á frídögum, synda eða gera eitthvað annað. Það er ekki frí. Maður þarf góða líkamlega hvíld, helst að gera sem minnst. Svo kemur maður ennþá sterkari til baka.