Suðurferð

Ég og ótrúlega fallegu systur mínar

Þá er maður kominn aftur norður yfir heiðar eftir vel heppnaða ferð til Reykjavíkur. Það var eiginlega ekki dauð stund frá því við Halldóra lögðum af stað á föstudaginn og þangað til maður settist aftur upp í bíl um hádegi í dag.

Á föstudaginn fórum við Halldóra að þvælast í búðir og fá okkur að borða. Það var brjálað að gera allstaðar og biðraðir í búðum. Eftir það fórum við svo og horfðum á Hauka tapa fyrir Val í handbolta. Það var frekar súrt enda Geiri hennar Helgu að spila með Haukum. En hann stóð sig mjög vel. Þegar við stóðum í anddyrinu eftir leikinn labbaði Guðni forseti upp að okkur og spurði hvort hann ætti að óska okkur til hamingju eða segja, "það gengur betur næst". Þvílíkur höfðingi.

Á laugardagsmorguninn vaknaði ég klukkan 08:00 og fór út að hjóla. Byrjaði á morgunmat á N1 og fór svo sextíu kílómetra hring um borg og bý. Kom við á Álftanesi til að hitta Skarphéðinn en hann var ekki heim. Um kvöldið var svo útskriftarveislan hennar Helgu heima hjá Jens og Ástu og það var rosalega gaman.

Í morgun hjólaði ég svo upp í Breiðholt og drakk kaffi með Dóra og Sigrúnu. Síðan löbbuðum við Hildur aðeins í bæinn og keyptum okkur allskyns núðlur í einhverri Thai búð.

Ég er s.s. búinn að hjóla 90 km um helgina og er mjög ánægður með það. Mér líður vel í fótunum en hvíldarpúlsinn er kominn í 70 þannig ég veit að ég þarf að sofa vel í nótt og hvíla á morgun. Eðlilegur hvíldarpúls hjá mér er 50 og ég er nýlega búinn að átta mig á því hvað þetta er góður mælikvarði á æfingaálag.

Börnin koma á morgun þannig næsta vika á eftir að fljúga. Æfingar vikunnar verða því væntanlega stuttar og snarpar. En kannski næ ég að koma þeim í pössun um helgina í svona 3 tíma svo ég nái kannski einum 100 km túr.