Meira um skuggann

Ég minntist aðeins á Jung hérna á blogginu í gær. Hver elskar hann ekki? Ég ætla hér aðeins að birta meiri hugleiðingar honum tengdum.

Jung hafði mikinn áhuga á “skugganum” - formum hans og innihaldi - og skoðaði hann gjarnan sem “það sem manneskjan vill ekki vera”. Hann sá greinilega að yfirsjón, afneitun eða það að vilja ekki takast á við skuggaþætti (shadow elements) er oft rót vandamála milli einstaklinga, hópa eða hreyfinga; og er gjarnan það sem espar upp fordóma milli minnihlutahópa eða landa og getur hleypt af stað allt frá félagslegum þrætum og upp í meiriháttar stríð (www.thesap.org.uk).

En hversvegna hefur þetta heillað mig svona mikið upp á síðkastið? Jú með því að reyna að skoða ómeðvitaða hluti í eigin fari (skuggann) hef ég komist nær því að skilja afhverju ég bregst illa við vissum aðstæðum (sem kveikja kannski reiði og vanlíðan). Einnig hefur það gefið mér dýpri skilning á viðbrögðum annara og þolinmæði við að takast á við erfiða og oft ómeðvitaða hegðun.  En nú langar mig að koma með dæmi (sem gæti reyndar vel átt við sjálfan mig) til að skýra þetta betur út:

Þannig gæti einhver ekki verið fær um að gera greinarmun á ákveðni og eigingirni og látið alla ýta sér til og frá allt sitt líf. Jafnvel látið traðka á sér. Þetta getur orsakað að gremja fer að krauma undir niðri sem svo skilar sér að lokum  í stöðugri sektarkennd. Í þessu dæmi eru tilburðir einstaklingsins til að sína skörungsskap og gremja, bæði hlutar af skugganum. Greining gæti því breytt gildismati einstaklingsins og komið honum í betra samband við tilfinningar sínar og þarfir, og þannig losað hann bæði við gremjuna og sektarkenndina.

Þarna getur góður sálgreinir eða sálfræðingur leitt fólk í ferðalag um undirdjúp sálarinnar og jafnvel náð að að lýsa upp einhverja skuggafleti sem geta varpað ljósi á andlega kvilla. Þetta er nefnilega oft alls ekki rökrétt og mjög erfitt fyrir fólk að átta sig á þessu sjálft. Ég held að það geti verið ótrúlega gaman að vera sálgreinir eða sálfræðingur. Leynilögregla hugans. Ég myndi læra þetta ef ég væri ungur.