Fréttir af veður og gróðurfari

Góðan daginn gullin mín.

Ég veit ekki hvort að það sé neitt tilefni til fréttaflutnings í dag enda hefur afskaplega fátt á daga mína drifið. Þá getur maður, í staðinn fyrir að sleppa því að blogga hafið innihaldslitlar lýsingar á veður og gróðurfari. Þetta er svona ekki ósvipað innihaldslausum samræðum Íslendinga og Norðmanna þegar þeir hitta fólk á förnum vegi. Þeir eru ekkert frábrugðnir Íslendingum að þessu leiti. En sem sagt, hér eru akrar grænir og í gær var 10°C hiti. Niðurstaða mín eftir þessa dvöl er sú að hér er aldrei neitt veður. Bara misbjart sem er ógeðslega frábært.

Fór í gær og drap þorsk sem hafði gengið í gegnum lyfjagjöf. Lamdi þá í hausinn með stöng, krufði, kyngreindi og viktaði kynkirtlana. Gekk svo með tárin í augunum út að tunnu og velti lokinu af. Upp steig fýla af rotnandi fiski og lýsi. Síðan láku þeir líflausir einn af öðrum ofan í hafsjó brostinna vona bræðra sinna sem höfðu bara þráð hafið. Tár lak niður kvarm, sleppti takinu og geislar sólar sundruðust í því þar sem það féll ofan í grútinn og blandaðist blóði bræðra minna. Undir hljómaði tregablandinn söngur Janis Joplin úr iPodinum mínum, "Bye Bye Baby, baby goodbye. Bye baby, baby bye bye".