Bic Mac

Medium Bic Mac meal.

Ég vaknaði klukkan 05:20 og tók rúmlega klukkutíma VO2 max æfingu. Ég brenndi 601 kaloríu. Bic Mac máltíð er 1080 kaloríur. Klukkan 16:30 fór ég svo og lyfti í klukkutíma og gæti hafa brennt 200 í viðbót. Afhverju er ég að tala um þetta? Ég veit það ekki?

Annars fórum við Harpa einu sinn i á Mac Donalds á Tenerife og það var geðveikt. Ég fékk mér Bic Mac eins og alltaf, ég get ekki annað. Mörgum finnst þetta algert rusl (sem það er vissulega í einhverjum skilningi), en mér finnst þetta alltaf sjúklega gott. Og ég skammast mín ekkert fyrir það. Kjötið er ómerkilegt en sósan, súru gúrkurnar og brauðið gera þetta guðdómlega djúsi. Frönskurnar á Mac Do eru líka alltaf fínar. Við skoluðum þessu svo niður með sitthvorum Mac Flurry með Oreo og karmellusósu, sennilega 200 cal í viðbót á kjaft. Eins gott að maður var að hreyfa sig. 

Í ferðinni passaði ég mig vel að vera alltaf fullur af orku á hjólinu og svo át ég nánast eins og mér sýndist þess á milli. Ég passaði mig samt alltaf að éta prótein (kjöt, rækjur, egg, túnfisk ofl.) reglulega en nóg át ég af hveiti, sykri og kartöflum. Í morgun viktaði ég mig og var 1 kg léttari en þegar ég lagði upp. Ég er búinn að reyna að halda aðeins í við mig eftir að ég kom heim en brennslan er væntanlega ennþá mjög há.

Ég át þokkalega skynsamlega um helgina en í kvöld vorum við með einhverja lausfrysta kjúklingabita sem eru djúpsteiktir í raspi, IKEA kjötbollur, hrísgrjón og barbeque sósu. Það er náttúrulega ekki mjög gáfulegt en ég nennti ekki út í búð. Á morgun ætla ég að éta salat í hádeginu og eitthvað hollt annað kvöld.

Það var s.s. nóg af æfingum í dag og á morgun á ég erfiða threshold æfingu og svo 2 klukkustunda endurance á miðvikudaginn. Síðan kemur frí á fimmtudag, 2 æfingar á föstudag (lyftingar og hjól) og æfingar laugardag og sunnudag. Þetta verða því ca. 13 klukkustundir þessa viku. Eins gott að næra sig skynsamlega.