Bullari

Skissa af kleinu

Ég gerði heiðarlega tilraun til að segja mig frá allri málningarvinnu eins og kom fram hér í síðustu póstum. Ég byrjaði galvaskur að senda á einhverja konu.

Bjarni: Því miður gengur þetta ekki upp, ég er ekki að komast yfir þetta og það hvorki gengur né rekur hjá mér. Mér finnst það leitt.

Viðskiptavinur: Æi, en leiðinlegt😞Geturðu bent mér á einhvern annan?

Bjarni: Ég skal kíkja aðeins á það fyrir þig og læt þig vita annað kvöld.

Viðskiptavinur: Bara ef þú hefur tök á! Kærar þakkir 🙏

Og þannig var ég kominn með verkefnið á mínar hendur 15 mínútum eftir að ég sagðist ekki getað klárað þetta. En ég settist svo strax niður, gerði eina skissu og hún var í skýjunum með þetta. Einu verkefni færra á mínum borði. Hef ekki tekið ákvörðun um hvort ég geri atlögu að hinum myndunum en finnst það líklegt. Æi það er aldrei orð að marka það sem ég segi.

Úr custom mode training builder í Zwift

Í vikunni bjó ég til 1:40 klst tempoæfingu fyrir daginn í dag. Tempo æfingar eru yfirleitt á svona 84-89% af FTP gildinu, þ.e. svona frekar erfiðar en ekkert of. Ég rúllaði í gegnum fyrstu blokkirnar og hækkaði svo effortið upp í 215 W því þetta var eiginlega of auðvelt fyrir mig, allavega í dag. Var bara helvíti sprækur. Ég er alveg að missa mig í þessu prógrammi að gera æfingar og það er svo mikið auðveldara að stýra álaginu og passa upp á að maður geri ekki of mikið, eða of lítið. Æfing dagsins skilaði 57 km og 339 metrum í hækkun. Þessi vika endaði því í ca. 180 km og 5:37 klst á hjólinu (+eitthvað smá meira samgönguhjólerí).

Annars hefur þessi helgi bara verið ljómandi góð og börnin koma í hús á morgun. Þá byrjar fjörið.