Skrifpúltið

Netmál

2012-02-10T13:20:00.000Z

Nú fer allt fram í fjölmiðlum. Nauðgunarmál, húsbrot, einelti, allt er þetta gert upp á netinu. Uppgjör við sjóslys fara líka fram á netinu. Ég er ekki að segja að þetta sé rangt, bara umhugsunarvert.

Nú er ég annars að bregða mér með la familia til Reykjavíkur. Daníel að fara að keppa á Gullmóti KR í sundi, mikið fjör. Blogg um það eftir helgi.

Kveðja, Bjarni

Íslenska leiðin

2012-02-08T12:59:00.002Z

Við Íslendingar, þ.m.t. ég sjálfur, eigum það til að fara okkar eigin leiðir að hlutunum. Það er nú reyndar eiginlega frekar regla en undantekning. Þannig gæti íslenska leiðin til að byrja að hlaupa litið út:

1)Fá hugmynd

2)Fara á nýjasta námskeiðið um hlaup (betri en öll fyrri)

3)Kaupa föt, skó, úr og brúsabelti til að verðlauna sig fyrirfram að vera byrjaður að hlaupa

4)Kaupa prógram af þjálfara

5)Skrá inn æfingar mánaðarins fyrirfram

6)Missa svo úr 1 dag sem verður til þess að ekki tekur því að halda áfram. Sérstaklega ekki þar sem maður er hvort eð er að fara á ráðstefnu til Luxemourg eftir 2 vikur þar sem verður ókeypis matur og vín sem mun skemma prógrammið en frekar.

7) Hætta að hlaupa

Þetta ferli endurtekur sig svo fljótlega nema þá með annari íþrótt. Íþrótt (stundum kallað heilsukerfi af þjálfurum) sem nú er fullyrt, af mörgum helstu sjálfskipuðu heilsumógúlum landsins, að muni skjóta þér á ógnarhraða nær takmarki þínu, sem er að líta út eins og fólk utaná tímariti. Þú reyndar gætir þurft að byrja á því að fasta í nokkra daga og svo drekka engiferdjús í eina viku, en hvað gerir maður ekki fyrir útlitið.

Kveðja, Bjarni

Þetta er mitt innlegg í dag í að vera uppbyggilegur og jákvæður

Frábært

2012-02-04T21:07:00.004Z

Jæja nú hef ég verið með pistil um hitaeiningar í smíðum alltof lengi. Ég var rétt í þessu að klára hann og setja hann inn í fróðleikinn hjá mér. Ég vil samt vara fólk við að þetta eru nú eiginlega bara gagnslausar upptalningar. Annars er ég að skrifa annan pistil um sund sem ég drulla vonandi inn fyrr en síðar.

Fór í Skokkhópinn í morgun og hljóp 10 km. Var að hlaupa í hópi með 2 körlum og það varð til þess að maður fór að sperra sig óþarflega mikið. Planið var að fara langt og hægt en þetta endaði öðruvísi. Æfingar ganga annars bara vel, maður er bjartsýnni með sundið en oft áður og stöðugar æfingar fyrir ITB bandið hafa nú gert það að verkum (ég kross fingur), að hnéin eru bara fín. Ég er að verða gangandi gagnabanki um hvernig á að laga hlauparahné svo endilega flettið upp í hausnum á mér.

Annars er bara allt fínt að frétta. Kona og börn dafna vel við heraga og ósveigjanlegan matseðil. Brynleifur er farinn að velta sér nokkuð reglulega og við höfum verið að fara með hann í ungbarnasund. Honum líkar það prýðisvel og það styttist í að hann verði látinn kafa, en hingað til höfum við bara verið að gera æfingar. Það verður gaman. Annars er það fyndið að drengurinn fær alltaf óstöðvandi sogþörf þegar hann er í lauginni og treður helst báðum höndum upp í sig í einu og vill vera þannig.

Að lokum vil ég koma með gullkorn frá Daníel. Ég veit ekki hvaðan hann hefur þetta, en ég er mjög ánægður með þetta. Við matarborðið sagði hann "Ég ætla aldrei að reykja, aldrei að drekka brennivín, aldrei að taka eiturlyf og aldrei að setjast á þing". Segir þetta eitthvað um ástandið í þjóðfélaginu í dag?

Hafið góða helgi,

Bjarni

Þunna línan milli lífs og dauða

2012-01-28T21:30:00.002Z

Er að reyna að fá Guðrúnu með mér í hjólaferðalag til Frakklands og nota þetta til að sannfæra hana.

Ég tek það fram, engin dettur eða slasast í þessu myndbandi.

2012-01-27T23:23:00.002Z

Var fyrst núna að finna valmöguleika á hlaup.com um að fá allar tölur um æfingar yfir á Excel. Þvílíkur happafundur fyrir nördinn í mér. Ég byrjaði í nóvember 2010 (sést ekki á stöplaritinu) en var búinn að vinna mig upp í 100 km á mánuði í janúar eins og sést. Síðan sést greinilega hvernig ég smám saman bætti í þar til ég krassaði með biluð hné í júní. Vegalengdirnar segja reyndar ekki alla söguna, heldur of mikill hraði og álag. Maður verður fyrst að byggja góðan grunn, það tekur tíma og er þolinmæðisverk. Síðan hef ég verið að bæta í aftur, sundið kom aðeins inn í október, rjúpnaganga í nóvember og svo keypti ég hjólið í desember. Nú horfir allt til betri vegar, bullandi hláka með uppstúf.

Í tilefni óveðurs í gær ákvað ég að best væri að fara út að hjóla. Færðin var svona upp og ofan en ég komst klakklaust frá þessu. Maður hefur alltaf heyrt að bílstjórar gefi skít í hjólreiðamenn og svíni á þá. Sú hefur nú ekki verið raunin hér í vetrarfærðinni á hraðbrautum Sauðárkróks og lofa ég ökumenn þessarar sýslu í hástert. Fékk þó eitt feitt svín á mig í gær og hefði gefið puttann ef ég hefði ekki mátt hafa mig allan við að hanga á hjólinu (hefði svo sagt "þarna fékk hann það sko óþvegið"). Það verður forvitnilegt hvernig gengur svo að hafa sig af stað í vinnu á morgnana hjólandi.

Kom svo við í sundlauginni á hjólinu til að busla eins og bundinn klaufi. Hef verið í mikilli sjálfsvorkun út af þessu sundi upp á síðkastið. Hef jafnvel látið mér detta í hug að foreldrar mínir hafi látið græða í mig lærleggi úr stáli og að ég muni aldrei synda eða keppa í þríþraut. Ég var farinn að plana útför að víkingasið fyrir sunddótið mitt, blöðkurnar, baujuna og sundgleraugun. Var búinn að finna álitlega knörr á Ebay. Þá gerðist eitthvað. Skrapp aðeins í laugina í dag og gerði eitthvað "múv" sem var aðeins að virka. Ætla ekki að ganga svo langt að segja að þetta hafi verið andleg upplifun en ég hlakka til að fara næst og athuga hvort þetta hafi verið heppni.

Jæja ég er að stikna á lærunum.

Kveðja, Bjarni

Video og brjálað að gera

2012-01-26T23:40:00.002Z

Er með einhvern haug af myndum sem móðir mín er alltaf að bíða eftir að ég setji inn á netið. Það hlýtur að fara að koma að þessu. Ég er ekki að kvarta þegar ég segi það, en það er alveg brjálað að gera hjá mér núna. Þegar háskólanámið blandast ofan í fjölskyldulífið, æfingar og þegar maður er að skipta um vinnu þar að auki, þá er ekki mikill tími aflögu. Ég hendi því inn einu krúttlegu myndbandi af erfingjanum til að byrja með. Birtan og gæðin eru ekki góð en gleðin skín í gegn.

Kveðja, Bjarni

Útsvar og sund

2012-01-25T12:29:00.001Z

Dreymdi að ég var að keppa í Útsvarinu. Þetta er nú eitthvað óljóst í hausnum á mér, en ég man að þetta var tekið upp í einhverju skólahúsi, grunnskóla einhversstaðar. Ég man að Anna Dóra á Helluvaði var annar spyrilinn og það voru 2 stelpur með mér í liði, man ekki hverjar. Ekki man ég heldur við hverja við vorum að keppa. Hinsvegar man ég að fjölskyldan mín var öll að fylgjast með, þ.m.t. amma mín. Borðið sem mitt lið sat við, hrörlegt og smíðað úr mótatimbri, var miklu lengra frá bjöllunni heldur en hjá hinu liðinu. Ég átti að hlaupa en náði aldrei bjöllunni. Þegar við áttum eftir eina 15 stiga spurningu man ég að við vorum með 12 stig en hitt liðið 60 og eitthvað. Lægsta stigatala í Útsvarinu frá upphafi og þvílík niðurlæging.

Eftir að þetta var búið fór ég út í garð að keppa í sundi með Arnrúnu Höllu og einhverjum börnum. Ég ætlaði að keppa í bringusundi þar sem ég kann ekki skriðsund. Öll börnin kunnu hinsvegar að synda skriðsund. Þetta varð því önnur niðurlæging á skömmum tíma.

Kveðja, Bjarni

Gröf og kaldir vetur

2012-01-19T20:28:00.002Z

Það er mjög auðvelt að leika sér með ýmis gögn, jafnvel setja þau upp myndrænt til að villa um fyrir- eða ljúga að fólki. Það eru til heilu bækurnar sem fjalla um þetta og má m.a nefna bókina „How to lie with statistics“ eftir Darrell Huff sem kom út árið 1954 og er einhver mest selda tölfræðibók allra tíma. Ég tek þó fram að ég hef ekki lesið hana.

Stundum gleymir maður þessu og kokgleypir illa matreidd gögn og gröf úr fjölmiðlum sem gefa ekki rétta mynd af ástandinu. Maður verður að fá almennilega yfirsýn yfir lengri tíma og læra að „trúa“ aldrei neinum línu- og/eða myndritum nema að maður skilji gögnin sem eru á bakvið myndina. En hvað er ég að tala um? Tökum dæmi af einhverjum ímynduðum fiskistofni. Hægt væri að birta Mynd 1. og segja sem svo, „Stofninn er í mikilli uppsveiflu og því ætti að vera óhætt að fara að veiða meira“.


Mynd 1. Stofnstærð einhvers ímyndaðs fiskistofns.

Mynd 2 er hinsvegar byggð á alveg sömu gögnum en nær bara yfir lengra tímabil. Þá sést glögglega að stofninn er ekki í slöku meðallagi. Ég tek það fram að þessi gögn eru bara út í loftið.

Mynd 2. Stofnstærð ímyndaðs fiskistofns yfir lengra tímabil. Rauði ferningurinn táknar fyrr grafið

Við gætum tekið annað dæmi, sennilega ennþá betra dæmi, þar sem gögnin spanna nákvæmlega jafn mörg ár. Við getum ímyndað okkur að þetta séu gögn um hækkun á hitastigi einhversstaðar. Í fyrra grafinu er hækkun hitasigs sýnd frá 0-punkti en í því síðara eru raunhitatölur birtar. Það væri óneitanlega meira fútt í því fyrir fréttamenn að birta fyrra grafið. Aftur tek ég fram að þetta eru bara einhvejar tölur.

Mynd 3. Sömu hitastigsgögnin birt með mismunandi hættii

Ég hef aldrei verið neitt sérstaklega sleipur í tölfræði en ég hef alltaf haft gaman að því að leika mér með gröf og myndir.

Annars kviknuðu þessar pælingar hjá mér vegna þess að ég var að gramsa í gömlum annálum og lesa aðeins um veðurfar og hvernig fólkið hafði það seint á 18. öld hérna á Íslandi. Að lesa þessar lýsingar setur allt krepputal í annað samhengi og maður fer að velta því fyrir sér að sjálfsagt ætti maður að vera duglegri við að líta um öxl, eða fara upp á hól og líta yfir sviðið. Maður þarf ekki að lesa margar blaðsíður í þessum annálum til að átta sig á því að fólkið sem byggði þetta land voru engir aumingjar. Við sjáum bara alltaf svo litla mynd af grafinu í einu, svo ég setji þetta nú í samhengi við þessa myndbirtingu mína hérna áðan. Hvað er að hafa það gott? Við hvað eigum við að miða?

Í Espihólsannál, ANNALES ISLANDICI, 1400-1800, (Hið Íslenzka Bókmenntafélag, 1957) segir meðal annars að árið 1781 hafi veðrátta frá nýári og fram á góu verið ærið góð, þaðan af stríðari með umhleypingsfjúks- og áfreðahríðum, so oftar var annað dægur regn, en annað frosthríð, og þessi veðurátt varað fram á sumarmál í Eyjafirði og Skagafirði. Sagt er frá því að fáeinar manneskjur hafi dáið úr hor í þessum sýslum (ekkert nánar tiltekið um fjölda). Síðan er rætt um fiskerí, sem var þokkalegt þetta ár. Við skulum svo grípa niður í textann þar sem rætt er um sjóskaða (bls.169):

„Þann 18. Sept. strandar svokölluð póstjagt, sem þaðan skyldi með sér flytja góss til Kaupenhafnar. Þar drukknuðu 7 menn, sem á duggunni voru, og 11 menn aðrir af Eyrarbakka, sem hjálpa vildu jagtinni til hafnar, meðal hverra var assistent Jón Jónsson Vídalín frá Laufási. Góss týndist þar einnieginn.“

Áfram er haldið í upptalningu á sjósköðum og kemur þar m.a annars fram að Hans Emmerlef drapst úr vosbúð í Hrísey eftir langa siglingu í miklum ísum. Skipstapi varð á Skaga með fjórum mönnum og einnig drukknuðu 4 menn frá Reykjaströnd (í Skagafirði). Í Barðastrandarsýslu fórust 2 skip með 7 mönnum, þar af 4 bræður. Tvö skip fórust syðra, annað á Seltjarnarnesi, hitt við Stapa (fjöldi látinna ekki tilgreindur). Þann 21. desember týndist svo áttæringur í Keflavík undir Snæfellsjökli með 9 mönnum af holsjó undir segli. Einn skiptstapi í Beruvík með Jökli þar sem týndust 2 menn , 2 komust lífs af. Þrír bátstapar með mönnum sunnan Snæfellsjökuls (fjöldi látinna ekki tilgreindur). Bátstapi á Breiðdal austur með fjórum mönnum.

Þetta gera allavega 49 manns en búast má við að talan sé nær 60 eða 70 manns. Bara það sem hafið tók á þessu eina ári. Á síðustu 2 árum hefur einn maður farist á sjó við Ísland (vona að ég fari rétt með).

1784 var að því ég best fæ séð ekkert sældarár enda veturinn afskaplega harður. Um það segir m.a (bls. 179):

„Vetur var hinn bágasti með allt slag. Var þá ís fyrir norðan allt land og ófært skipum. Horfðist á til mannfalls, þegar búið var að eta þær dauðhoruðu skepnur upp, hvað og skeði, því þá sótti á útmánuði, gjörðist so mikið mannfall á fátæku fólki einkum, að varla heyrðist annað dag hvern, af hungri, dysenteria eður blóðsótt og fleirum eldgangsins leifum, þar áður voru hross hartnær alfallin ásamt öðrum skepnum. Var þó gott fiskerie fyrir vestan Jökul og sæmilegt víðar.“

Skólapiltur er sagður hafa fótbrotnað eftir að klukka datt ofaná hann í Skálholti og Skeiðarárjökull hljóp fram með vatnavöxtum og eldi. Síðan er minnst á mikinn drífusnjó sem kom í febrúar, þá fórst Sigfús á Syðstabænum þegar hann fór niður um lagnaðarís á Hríseyjarál. mikill jarðskjálfti þann 15. Februari. En grípum niður í textann þegar farið er að fjalla um sjúkdómana aftur (bls. 180):

„Þetta ár varð vart við ýmsa sjúkdóma. Þeir menn, er dóu um vorið úr hor og blóðsótt, stirðnuðu ekki, og fyrir klaka og áfreðum gat jörð ekki sprottið, jafnvel þó heyið yrði notabetra en hið fyrra ár. En það varð mönnum að stóru gagni, að skipin og matvörur komu jafnvel venju framar, þó ólíklegt mætti þykja á Noðurlandi, vegna íssins, og það var nú hin helsta lífsbjörg, því áður var etið allt, hvað tönn á festi, so sem skóbætur, horn og jafnvel af sumum hundar, að ég tala ekki um hrossakjöt, sem var almenn fæða, meðan fékkst jafnvel úldið og stórskemmt.“

Þarna erum við að tala um að fólk var að drepast úr vosbúð og hungri í stórum stíl. Ef þetta er svo ekki nóg, þá er talið að um 4000 hestar hafi fallið í Skagafirði og beinin m.a verið notuð í eldivið. Ef við viljum svo reyna að ímynda okkur hvernig ferðalög milli bæja og sveita gengu fyrir sig á þessum tíma nægir að nefna, að árið 1772 urðu 23 menn úti bara á Suðurlandi.

Það mætti svo sem gagnrýna mig fyrir að handvelja bara vondar fréttir úr annálum til að láta líta út fyrir að allt hafi verið í voða og djöfli og nú sé allt frábært. Það virðist þó ekki hafa ratað mikið af jákvæðum fréttum í annála þessa tíma, allavega ekki það sem ég hef lesið. Á stöku stað er þó nefnt að mannheillir hafi verið góðar. Einnig nokkuð talað um vígslur presta, biskupa og embættistökur hjá fínna fólki. En mér finnst þetta þó sýna hversu mikið tímarnir hafa breyst og maður ætti stundum að kvarta minna.

Kveðja, Bjarni

Vinstra hret

2012-01-19T11:29:00.000Z

Ég hafði einusinni trú á Vinstri Grænum, m.a. vegna þess að þeir virtust alltaf samkvæmir sjálfum sér. Þeir voru alltaf skýr valkostur, ólíkt t.d Samfylkingunni sem kom alltaf út sem ósamstæður hópur af mis bitru og stefnulausu fólki með blindklúta og valdasýki. Nú stendur hinsvegar ekki steinn yfir steini hjá Steingrími og co. og ljóst að flokkurinn er kominn vel á leið með að moka eigin gröf svo djúpa að sennilega komast þeir aldrei upp aftur. Ég lýsi yfir frati, þó aðalega sárum vonbrigðum með þetta fólk.

Hvað höfum við lært á síðustu misserum? Jú, ef þú ert ekki sáttur við að allt fari fram nákvæmlega eftir þínu höfði, gakktu þá á braut og skelltu á eftir þér. Aldrei íhuga málamiðlanir og ekki horfa út fyrir þrönga rörið sem þú ákvaðst að væri best fyrir svo löngu síðan. Síðan er bara að stofna nýjan stjórnmalaflokk, enda lítur ekki út fyrir að þeir verði nema svona 25 í næstu kostningum. Svona er þetta reyndar því miður í fleiri flokkum.

Kveðja, Bjarni

2012-01-16T14:07:00.000Z

Ósmann

Incubation time hjá mér í vinnunni og því ekki úr vegi að henda inn nokkrum línum.

Skellti mér í magnaðan hjólatúr á Aðalsteini í gær. Fór fyrst að heimsækja Ósmann en hjólaði svo upp úr bænum í hina áttina. Gott veður, mikið af fólki komið út að hreyfa sig. Fór 27 km og það er gaman að finna hvað líkaminn, aðalega anusinn þó, venst þessum nýju stellingum og álagi smátt og smátt. Ég er með 2 ferðir á döfunni á næstunni; ætla að hjóla í Steinhóla (til tengdó) og svo langar mig að fara upp á skíðasvæði, sem verður reyndar nokkuð strembið reikna ég með.

Fengum gesti í mat um helgina, Halldór og Hildur á Ríp kíktu með börnin. Eldaði folalda fillet og lund. Borið fram með Bearnaise og frönskum. Það var ekki svo vitlaust en sennilega best að éta þetta ekki oft í viku.

Skilaði mínu fyrsta verkefni í Háskóla Íslands í gærkvöldi/nótt. Skrítin tilfinning að vera kominn í skóla aftur. Áhugavert á hinn bóginn að vera að læra eitthvað svona djöfull áhugavert. Jæja nú er kominn tími á að setja chromogen substrate út í elísuna...

Kveðja, Bjarni

Ps. Erum að vinna í myndapakka fyrir afa og ömmur

Úr einu í annað

2012-01-13T22:34:00.001Z

Var að klára að horfa á Útsvarið eins og við gerum alltaf á föstudagskvöldum hér á bæ. Magnað hvað þetta lið frá Fljótsdalshéraði lyftir manni alltaf upp, enda þrælskemmtilegt fólk. Ég held eiginlega meira með þeim heldur en Skagfirðinum, segi það og skrifa. Djöfull er það annars magnað að maður skuli vera að blogga um Útsvar, mætti halda að maður væri byrjaður að drekka aftur.

Var að byrja að taka saman einskonar áramótauppgjör, eða öllu heldur annál fyrir 2011. Besta ár lífs míns, enda fæddist mér yndislegur sonur. Síðan fór ég að velta fyrir mér öðrum hlutum, t.d golfi. Hámark golfsumarsins var þegar skorkortið mitt var dregið úr á Opna Vodafone mótinu og ég fékk lampa, sem mig reyndar sárvantaði. Meiddur á hné, allir frískir að öðru leiti. Sæmilegt ár.

Hér er eilíf hláka ef frá eru taldir fimbulkuldar sem herja á inn á milli. Veður válind og erfið til útivistar. Maður hefur alltaf laugina. Ef einhverjum kann að finnast þetta samhengislaust blogg, vil ég benda á að ég er netlaus á vinnutölvunni hérna heima og er að stelast í tölvuna hennar Guðrúnar... verð að hætta... heyri eitthvað þrusk,....... held að Guðrún........aAAAAAAAAAAAAAAAAAAAAA

2012-01-05T21:45:00.003Z

Jæja það er ekki hægt að saka mig um að hafa verið duglegur að blogga upp á síðkastið en það er ýmisslegt í bígerð hvað það varðar. Ég er að safna í gagnabankann fyrir hjólapistil og svo sat ég í gærkvöldi og tók saman skemmtilegan fróðleik um orkuinntöku íþróttamanna. Einnig leiðinlegar staðreyndir eins og að það taki meðalmanninn 4-5km á hlaupum að brenna tveimur laufabrauðskökum.

Eitt af því sem ég hafði lofað mér um áramótin var að vera duglegri að éta baunir og grænmeti. Það kemur yfir mann einhver stólpípuandi eftir hátíðarnar þó maður trúí ekki á hreinsanir. Hef svosem verið nokkuð stabíll á því síðustu daga. Þegar ég var hinsvegar að stíga upp úr baðinu áðan áttaði ég mig á því að ég var bæði búinn að éta sviðakjamma í dag og heimagerða sperla með jafningi og kartöflum. Það mætti halda að ég væri á kúrnum hans Sigmundar Davíðs.

Fór út að hjóla áðan í frostinu og er endanlega búinn að komast að því að ég verð að fá mér hlýrri vettlinga, svokallaða windstopper. Einnig verður maður að fara að nota hlífðarbuxur eða fjárfesta í vetrar-hjólabuxum. Þetta er aðeins annað en að hlaupa. Ef maður er í -5°C og er kominn á 20 km/klst er kælingin orðin eins og maður sé í -18°C.

Hvað æfingar og þríþraut varðar er ég svo sem ekkert að gera nema rétt að halda mér við. Ég sé það samt á æfingardagbókinni að af síðustu 11 dögum er ég búinn að æfa eitthvað 9 daga þó veðrið hafi ekki leyft neinar super-æfingar. Ég held því áfram að einbeita mér að sundinu. Það er líka kostur við sundið að geta tekið Daníel og Brynjar með.

Annars er allt gott að frétta af okkur. Strákarnir bara hressir þó Brynleifur litli sé með einhverja kvefpest. Hann nær því væntanlega úr sér fljótt. Vorum að skrá okkur með hann í ungbarnasund og það væri gaman að finna einhvern sem á góða myndavél sem þolir smá bleytu. Mikil tilhlökkun.

Kveðja, Bjarni

Gleðilegt nýtt ár!

2012-01-01T02:23:00.001Z

Ég ætla ekki að vera með áramótaheit í ár heldur lykilorð. Lykilorð ársins 2012 er "Hófsemd". Ég ætla að gerast hófsemdarmaður á nýju ári.

Góða nótt, Bjarni

Umferð

2011-12-31T00:05:00.001Z

Sé að það hefur verið nokkuð mikil umferð hérna inn á bloggið hjá mér í gær og í dag. Ekki veit ég hverju það gegnir en það er vísast best að reyna að henda inn nokkrum línum til að halda þessu á lífi.

Við höfum haft það prýðilegt síðustu daga, strákarnir hjá pabba sínum en við gömlu sprekin fórum með Brynleif Rafnar í heimsókn til ömmu og afa í Mývó. Það hafði vægast sagt mjög róandi áhrif á líkama og sál. Við lágum eins og hlussur með slefið út á kinn en stóðum á fætur við og við til að nálgast meiri matvæli. Ég fór samt upp í sal og tók eina góða æfingu.

Á morgun verður nóg við að vera. Byrjum á Gamlárshlaupi hérna á Króknum en föru svo upp í Hjaltadal til að éta. Kíkjum svo líklega á brennu á Hólum en stefnum síðan hingað á Krókinn til að horfa á Skaup og skjóta upp. Við verðum ekki alveg ein því Silla, Gummi, Anna Guðrún, Guðný Erla, Árni Gísli, Heiða, Louisa, Sigga Júlla, Haukur, Þórður, Stefán Snær, tengdapabbi og tengdamamma koma líka. Þröngt mega sáttir sitja.

Fór í sund í gær og gengur ágætlega með sundplanið mitt. Ég er að fylgja Total Immersion Six Week Beginner Freestyle Stroke Efficiency Program (hananú). Er búinn með 2 fyrstu æfingarnar og á 17 eftir. Þetta byggir allt á að gera ákveðnar æfingar sem margar hverjar líta ekki út fyrir að tengjast skriðsundi á nokkurn hátt en í lokin tengir maður þetta allt saman og útkoman á að vera allt að því getnaðarlegt skriðsund. Hljómar eins og töfrar og við skulum sjá til hver útkoman verður. Ég held að það sé lykillinn að því að skrönglast gegnum Olympíska þríþraut án skammar að koma létt út úr sundinu. Með því að spara orku í sundinu á maður nóg bensín á tanknum fyrir hjólið og hlaupið. Maður getur ekki unnið þríþrautina í sundinu en maður getur sannarlega tapað henni þar með orkubruðli.

Fór svo út að hjóla í dag og það var snilld. Hjólaði 15km; að heiman, upp á Hegranes, út á bryggju og svo heim. Þetta er óheyrilega gaman og hjólið er að koma frábærlega út. Ég á ennþá eftir að gefa mér tíma til að taka af því almennilegar myndir og skrifa góða grein.

Kíkti áðan á hlaup.com og var að kíkja á statistíkina hjá mér fyrir árið 2011. Það er nú einhver ruglingur í þessu þar sem bókin segir að ég sé bara búin að hjóla 19km. En ef samtalan mín fyrir hlaupin er rétt þá hef ég hlaupið 1265km á árinu (ca. 3,5km/dag að meðaltali). Ég ætlaði mér töluvert meira en veglengdir skiptir kannski ekki svo miklu máli og ég er búinn að vera óþarflega mikið meiddur. Vonandi þarf ég ekki að breyta markmiðum mínum mikið fyrir næsta ár, en það verða þó ekki endalok heimsins. Jæja nú er ég bara byrjaður að tuða og læt þetta gott heita.

Gleðilegt nýtt ár, Bjarni

Meiri Jól

2011-12-25T17:28:00.001Z

Jæja þá er þetta búið spil. Búið að rífa upp pakkana og mann er strax farið að hlakka til næstu jóla. Sjálfsagt ekki vitlaust að fara að búa til nýjan tossalista og kaupa grænar baunir.

Tengdó voru hjá okkur í gærkvöldi og við buðum upp á hamborgarahrygg og rjúpur. Eitthvað fyrir alla. Maturinn heppnaðist bara vel. Heimagerður ís á eftir með heitri sósu.

Ég held að allir hafi verið prýðis ánægðir með gærkvöldið og nóg var um góðar gjafir. Frá Guðrúnu fékk ég hlaupapeysu, hlaupasokka, bók og statíf til að setja Garmin úrið á hjólið mitt, strákarnir gáfu mér Angry Birds handklæði og svo fékk ég forláta vetrarhlaupabuxur frá öllum í Brekku. Ég gaf Guðrúnu vetrarhlaupabuxur og hlaupajakka. Ég og Guðrún fengum svo sængurföt, handklæði, skurðarbretti og ég veit ekki hvað og hvað. Nú er bara að tæma kistuna og fara að skera og skera. Fara svo örþreyttur í bað, þurrka sér með nýju handklæðunum og leggjast svo til hvílu í nýjum sængurfötum og hafa með sér nýskornar afurðir af nýja brettinu.

Við gáfum strákunum flotta skíðahjálma og gleraugu. Við vorum fyrst ekki viss hvort við hefðum hitt í mark en þeir eru nú búnir að vera með þetta á hausnum síðan í gær þannig að þetta hefur sennilega ekki verið svo vitlaust. Þetta og margt fleira skemmtilegt má sjá í nýja Jól 2011 albúminu.

Uppi á Hegranesinu

Ég fór út að hlaupa áðan. Langaði eiginlega frekar að hjóla en hafði ekki hlaupið svo lengi. Ætlaði að hlaupa Borgarsandinn en það var háflóð og brim þannig ég mátti finna nýtt plan. Lagði bílnum bara við sandinn og hljóp þjóðveginn upp á Hegranes. Stoppaði hjá Jóni Ósmann og óskaði honum gleðilegra Jóla. Það var kuldalegt hjá Jóni í dag; sunnan næðingur og -4°C. Þetta endaði í rúmum 8km.


Jón stendur vaktina

Jæja nú er að fara að koma sér upp í Hjaltadal og fá sér hangikjöt í góðra vina hópi. Ætla út að hjóla á morgun ef veðrið verður ekki leiðinlegt.

Hafið það gott elskurnar, Bjarni